பெங்களூருவில் புத்தாண்டு கொண்டாட்டங்களை முன்னிட்டு, கஞ்சா விற்பனையாளர்கள் தங்கள் நடவடிக்கைகளை தீவிரப்படுத்தியுள்ளனர். காவல்துறையினரின் கண்காணிப்பிலிருந்து தப்பிக்க, அவர்கள் எக்ஸ்பிரஸ் ரயில்களைப் பயன்படுத்தி, ஆந்திரா, தமிழ்நாடு மற்றும் ஒடிசா உள்ளிட்ட பகுதிகளிலிருந்து கஞ்சாவை டிராலி பைகளில் மறைத்து நகருக்குள் கொண்டு வருகின்றனர்.
சமீபத்திய நடவடிக்கையில், ரயில்வே போலீசார் ரூ.1 கோடி மதிப்புள்ள 86 கிலோ கஞ்சாவை பறிமுதல் செய்து, 8 நபர்களை கைது செய்தனர். கஞ்சா விற்பனையாளர்கள், புத்தாண்டு விருந்துகளை முன்னிட்டு, விருந்தினர்களை குறிவைத்து செயல்பட்டு வருகின்றனர். பெங்களூருவில், குறிப்பாக ஐடி துறையில் பணியாற்றும் இளைஞர்கள் மற்றும் யுவதிகள் பலர் போதைப்பழக்கத்துக்கு அடிமையாகி வருவதால், கஞ்சா மற்றும் பிற போதைப்பொருட்கள் நுழைவதைத் தடுக்க போலீசார் தீவிர எச்சரிக்கையுடன் உள்ளனர்.
காவல்துறையினர், போதைப்பொருள் கடத்தலைத் தடுக்க சோதனைச் சாவடிகள் அமைத்து, ரோந்து பணிகளை அதிகரித்துள்ளனர். பொதுமக்கள், சந்தேகப்படும்படி சுற்றித் திரிபவர்களைப் பார்த்தால், அருகிலுள்ள காவல் நிலையத்திற்கு தகவல் தெரிவிக்க வேண்டும்.
